علم الشيتة

كاين مئات الأنواع ديال الشيتات و كل نوع عندو الخصائص ديالو و لاش كايصلاح، داكشي علاش خاسنا نختارو بدقة الشيتات لي غايصلاحو لنا.

كيفاش نلقاو هاد الشيتة؟ شمن وحدة نختارو بالضبط؟  لاش كاتصلاح بالضبط؟ شمن نوع ديال الشعر و منين جاي؟

باش تلقا الشيتة لي تشري خاسك تبع هاد المنهجية.

1- حدد الاسلوب :

يلا كنتي كاتبصبغ بلاكواريل : خاسك شيتة قصيرة باش تحكم فيها مزيان و يكون الشعر ديالها كايمص و كايشرب الما مزيان ، أحسن وحدين هما لي مصاوبين بشعر السنجاب ولا السمور. الشعر ديالهم رقيق بزاف و رطب هادشي لي كايخليهم يتثناو فاش تبرك عليهم حتى كايوليو على شكل المروحة اليدوية لي كايعطي واحد الخط غليض بالصباغة. 

يلا كانت الشيتة من النوعية المزيانة و حافظتي عليها غاتبقا لك مدة طويلة.

يلا كنتي كاتخدم ب لاكريليك: الشعر د الشيتة كايكون اصطناعي مصنوع من النيلو كاين لي كايكون رطب و كاين لي حرش و قاسح ، أهم حاجة فهاد الشيتات هي خاسك تغسلهم مزيان فاش تسالي حيت لاكرليك يلا نشفات ماكاتحيدش.

يلا كنتي كاتخدم بالصباغة د الزيت: كاتقدر الشيتة تكون اصطناعية ولا بشعر طبيعي الاستثناء لي كاين هو ماشي ديال السنجاب حيت ماكيقاومش المواد ديال التنظيف "وايت سبيريت"، كاتقدر تكون ديال الظربان ولا ديال أذن البقرة ولا الفرس القزم "pony" ... بالنسبة ليا هم المزيانين فالاستعمال.

2- حدد كيفاش كاتصبغ :

يلا كنتي كاتعتمد على التفاصيل الصغيرة : هنا خاسك شيتة قصيرة و الشعر ديالها رطب، كل ما كانت قصيرة كل ما يديك كاتقرب كثر للوحة ديالك و كل ماحسيتي بها خفيفة، اذن كايكون تحكم كثر ، بالنسبة للشعر كل ماكان قاصح ولا حرش كل ما كايساعد باش ينشر الصباغة فوق سيبور لي خدام عليه. ولكن عنداك يلا كان قاصح و حرش بزاف كايخلي آثار الشعر فوق الصباغة لي كايبانو خايبين فاش كايكون الهدف ديالنا هو  سطح ناعم. 

يلا كنتي كادير التعجين "empâtement" هي فاش كادير طبقة سميكة ديال الصباغة فوق سيبور، هنا خاسك الشعر قاسح و شيتة طويلة لي كاتعطيك واحد المرونة فالتحرك . فالغالب كاتكون مصوبة بشعر الحلوف حيت كايكون قاصح و مرن فنفس الوقت و المنظفات ماكيديو منو والو. 

3- حدد الشكل :

باش دير خطوط طويلة: الشعر رطب و طويل

باش تخدم تفاصيل صغيرة : الشعر قصير 

باش طلق الصباغة فوق سيبور : خاسك شيتة مسطحة "flat" لي هي "Brosse" ولا لسان القط "filbert" 

باش دير الضبابية ولا الذوبان : الشيتة المروحة "Fan" لي كايسموها بالفرنسية "éventail" 

4- حدد الحجم (ديال الشيتة) :

مكاين لاش نكتب بزاف هنا حيت الحجم كاتختارو أنت على حساب داكشي لي غاتخدم.

السؤال لي كايتطرح هو الثمن لي كايقدر يبدا من 15 درهم لشيتة صناعية و يوصل ل 1500 درهم لشيتة كبيرة بشعر السمور. شيتة مزيانة احترافية كاتكون غالية شوية و هادشي كاينعكس فاللوحة لي كاتخدم فحين يلا كانت الجودة ناقصة كاتعدب شوية ولا بزاف فالخدمة خصوصا يلا كنتي كاتقلب على التفاصيل الصغيرة و الانسيابية .

لحسن الحظ يمكن لك تلقا ديما واحد الخيار زوين لي كايجمع بين الجودة و الثمن.