شكون و علاش هوليسيت ؟

هوليسيت هو أول موقع مغربي لي الهدف ديالو هو يرد الفن التشكيلي فمتناول جميع المغاربة بكل الاطياف ديالهم. هاد المجال لي كان فواحد الوقت محتكراه واحد العينة مجتمعية بورزوازية ولا من الأغنياء الجدد و مستافدة منو بوحدها و كاتستاعملو لأغراض شخصية و كاتحاول تنشر بعض التيارات معينة و تدفن وحداخرين، علاش كايدفنو التيارات لخرين؟واقيلا حيت عيالاتهم كايجهم داكشي صعيب و كايعصبهم و كايدخلو فأزمات صحية و نفسية لي كايأديو للتشتت العائلي؛ للا الباتول يلا تعصبات مايقدش عليها مولاي كريط. D:

نرجعو للموضوع ديالنا، باش نبسطو المعلومة و توصل للمغاربة و يفهموها كلهم اختاريت نستعمل هاد اللغة لي كاتجمعنا "الدارجة" حيت هي الاقرب لنا و كانبدعو فيها و كانعبرو بها و حنا مرتاحين ، و يلا ماكنتيش كاترتاح فها ولا كاتجيك مصوفجة سير قلب على المعلومة فبلاصة خرى بلا ماتصدع ليا راسي . أما بالنسبة لصحاب "هادشي كلشي عارفو " و "انت داير فيها معلم" ، كانقولهم بلي يلا كنتي عارف هادشي لي أنا متأكد أنك ماعارفوش، كون شاركتيه مع الناس و ماحتاكرتيش المعلومة لي ماعندكش و ماعمرها غاتكون عندك... و شكرا.