كفاش نبداو الصباغة د الزيت ؟

البداية ف الصباغة د الزيت كاتبان دائما زوينة و ممتعة ولكن أول مشكل كانلقاوه هو ماكانعرفوش كيفاش نبداو و باش نبداو. فهاد السطورة لي جايين غانحاول نجاوب على هاد الأسئلة لي كايطرحها كل واحد فالاول.

الصباغة د الزيت عندها واحد السمعة تابعها ديما : عندها أسس و تقنيات تقليدية، زوينة ولكن معقدة شويا. وهادشي صحيح، الصباغة د الزيت معقدة بالنسبة للناس لي ماعندهومش معلومات مضبوطة و علمية عليها و كايآمنو بلي الموهبة هي كولشي ، الموهبة مزيانا ولكن يلا ماعندكش رصيد معرفي علمي على الصباغة ماعمرك تقدر تعطينا لوحة مزيانة من الناحية التقنية، على سبيل المثال يلا ماكنتيش كاتعرف شنو هو "Medium" و الانواع ديالو و الدور ديالو و التأثير الكيميائي ديالو على الصباغة، ماعمرك غاطلعلك الصباغة كيف بغتي نتا واخا تكون عندك موهبة ربانية ديال ليوناردو داففينشي.

نرجو لكفاش نبداو الصباغة.

1- نشريو ولا نضبرو على المتريال 

هنااا دخلنا فالمعقول و المشكل الاول، المتريال ديال الصباغة د الزيت شويا غالي و الدراري لي بغاو يبداو تقريبا كلهم تلاميذ و طلاب و ماخدامينش . لذلك عزبزي القارئ غانعطيك أرخص استثمار ممكن لي غايعطيك نتائج مزيانة و جد محترمة. غاتعتمد على 4 د الحاجات : الشيتات، الصباغة، ميديوم، و سيبور علاش تخدم.

الشيتات : 2 بروس مسطحين "flat" و 2 ضايرين "round" 

الصباغة: كاليطي "fine" و 6 ألوان على الأقل

ميديوم :زيت بذر الكتان "huile de lin"، ليصونص د طيريبونتين "essence de térébenthine"

سيبور : بلوك ديال الاوراق الخاصة بالصباغة د الزيت ولا لاطوال ولا الخشب.

2- وجد راسك

الصباغة ديال الزيت ماشي ممارسة عفوية ، خاسك توجد لها الظروف المناسبة و بزاف د اللعيبات بطريقة دقيقة. 

- الخليط ديال ميديوم فبزاف د الاحيان كايكون مضر بالصحة، من الاحسن تخدم فبلاصة مهوية و ماتسدش عليك فبلاصة مزموتة. 

- توجد شي حاجة تخدم عليها : طبلة ولا شوفالي "chevalet".

- يلا كنتي يمني حط باليط و ميديوم ديالك فليمن ديالك. 

-ماتخويش الصباغة بزاف فالباليط، من الاحسن تزيد كل ما حتاجتي على أنك تخوي بزاف و يضيع لك. 

- الميديوم حتى هو من الأحسن تخوي شويا فشي غلاقة د القرعة مثلا و تخدم به. 

3- انطلق 

انت فهاد اللحظة واجد باش تبدا الصباغة ، ختار موضوع صغير مافيهش بزاف د التفاصيل و خدمو على سيبور صغير، ماتزعمش بزاف فالأول على أحجام كبار و ركز على خليط الالوان و الجرعة ديال الميديوم لي غادي نعطيكم عليهم معلومات دقيقة قريبا، فاش تكون خدام فشي لون و تبغي تدوز للون آخر نظف الشيتا ديالك مزيان فواحد الكاس عامر ب وايت سبيريت لي غاتشريه من أي دروغري  بثمن رخيص، و مسحها مزيان راك فاهم...